Liverpool-da Mohamed Salah ətrafında yaranan gərginlik hələ tam aradan qalxmayıb. Komandanın ulduz futbolçusu ötən ay mətbuata verdiyi qalmaqallı açıqlamalarla diqqət çəkmiş, baş məşqçi Arne Slotla münasibətlərinin pozulduğunu demişdi.

Məsələ qismən sakitləşsə də, Salahın AFCON-da iştirakı və Liverpool-un məğlub olmaması fonunda mövzu arxa plana keçib. Yayda ayrılıq ehtimalı qalsa da, misirli futbolçunun mövsümün sonuna qədər komandada qalacağı gözlənilir.

Tim Şervuddan Slot üçün xəbərdarlıq

Keçmiş Tottenham və Aston Villa baş məşqçisi Tim Şervud Arne Slotun Salahla bağlı qərarını yenidən gözdən keçirməli olduğunu bildirib. Onun fikrincə, israr mövsümə baha başa gələ bilər.

Şervud vurğulayıb ki, Salahın mətbuata çıxışı klubun maraqlarına zidd olsa da, hazırkı şəraitdə ondan imtina etmək Liverpool üçün risklidir. Xüsusilə Isakın uzunmüddətli zədəsi Salahın əhəmiyyətini daha da artırır.

Isak zədəsi planları dəyişə bilər

Şervudun sözlərinə görə, Slot Salahla yolları ayırmaq istəsə belə, nəticələr hər şeydən önəmlidir. Liverpool-un qələbələr qazanması üçün Salah hələ də əsas fiqurdur və yayadək ondan maksimum istifadə olunmalıdır.

Yekunda qeyd olunur ki, həm Slot, həm də Salah kompromisə getməlidir. Ortada ortaq məqsəd Liverpool-un uğurudur və mövsümün ikinci yarısında bu balans qorunmalıdır.