Beşiktaş qış transfer pəncərəsində Tammy Abrahamı satmaq üçün təxminən 20 milyon avro tələb edir. Sabah nəşrinin məlumatına görə, 28 yaşlı ingilis hücumçu ilə Aston Villa ciddi şəkildə maraqlanır.

Bildirildiyinə görə, Beşiktaş Abrahamın transferi üçün əvvəlcə müqavilədə yer alan 13 milyon avroluq məcburi satınalma maddəsini aktivləşdirməlidir. Bundan sonra klub futbolçunun satışını 20 milyon avro qarşılığında dəyərləndirməyə hazırdır və yanvar ayında ayrılığa yaşıl işıq yandıra bilər.

Tammy Abraham Chelsea-dən ayrıldıqdan sonra qeyri-stabil dövr keçirsə də, bu mövsüm Beşiktaşda formunu bərpa edib. O, bütün turnirlərdə 24 oyunda 12 qol və 3 assistlə çıxış edərək diqqət mərkəzinə düşüb.

Aston Villa hücum xəttində alternativlər axtarır. Komandanın Ollie Watkins-dən həddindən artıq asılılığı və digər hücumçuların qeyri-sabit çıxışı Abrahamı real namizədə çevirir. Onun transferinin yüksək məbləğ tələb etməməsi də Villa üçün üstünlükdür.

Son məlumatlara görə, Aston Villa bu transfer üçün ilkin razılıq alıb və qarşıdakı həftələrdə 20 milyon avroluq keçidin reallaşması mümkündür.