Barcelona Joao Cancelo-nun transferini yenidən rəsmən açıqlayıb. Klubun yaydığı məlumata görə, 31 yaşlı portuqaliyalı müdafiəçi 18 ay sonra ikinci dəfə Kataloniya təmsilçisinə qayıdıb.

Cancelo-nun transferi ilk dəfə bazar ertəsi elan edilsə də, ertəsi gün planlaşdırılan təqdimat mətbuat konfransı gözlənilmədən ləğv edilmiş və açıqlama silinmişdi. Bu qarışıqlığın səbəbi kimi Al-Hilal klubunun sənədlərlə bağlı əlavə tələbləri göstərilirdi. Məsələ həll edildikdən sonra Barcelona transferi yenidən təsdiqləyib.

Joao Cancelo daha əvvəl 2023/24 mövsümündə Manchester City-dən icarə əsasında Barcelona-da çıxış edib. Xavi Hernandez-in son mövsümündə komandada yer alan müdafiəçi əvvəlcə sağ, daha sonra sol cinahda oynayıb və hücumda faydalı çıxışı ilə seçilib.

Lakin mövsümün ikinci yarısında onun oyunu enişə keçmiş, xüsusilə müdafiədəki zəif cəhətləri diqqət çəkmişdi. Barcelona həmin mövsüm Çempionlar Liqasından erkən kənarlaşdırılmış və La Liqa çempionluğu uğrunda mübarizəni itirmişdi.