Barcelona qapıçısı Mark-Andre ter Ştegen indiyədək klubdakı yer uğrunda mübarizə aparmaq niyyətində idi. Lakin Joan Qarsiyanın gəlişindən və Hansi Flickin kubok oyunlarında da əsas qapıçı kimi ona üstünlük verməsindən sonra alman qolkiper mövqeyini dəyişib.

33 yaşlı qapıçı dekabrın sonunda Girona tərəfindən maraq görsə də, əvvəlcə Barselonadan ayrılmaq istəmirdi. Almaniya millisinin idman direktoru Rudi Völler və baş məşqçi Julian Nagelsmann isə ter Ştegenin əsas heyətdə mütəmadi oynamasının Dünya Çempionatında bir nömrə olmaq üçün vacib olduğunu açıq şəkildə bildiriblər.

Məlumata görə, ter Ştegen Girona-ya icarə əsasında keçməyə müsbət yanaşır. Bu variant ona həm ailəsinə yaxın qalmaq, həm də mütəmadi oyun praktikası qazanmaq imkanı verir. Sport nəşri yazır ki, razılaşma əldə olunarsa, qapıçı keçidə yaşıl işıq yandıracaq.

Lakin klublar arasında maliyyə məsələsində ciddi fərq var. Barcelona icarə üçün ter Ştegenin illik təxminən 12 milyon avroluq maaşının ən azı 20–25 faizinin Girona tərəfindən ödənilməsini istəyir. Girona isə maksimum 1 milyon avro ödəməyə hazırdır. Mövsümün qalan hissəsi üçün bu fərq təxminən 1,5–2 milyon avro təşkil edir.

Keçidin hər iki tərəf üçün məqsədəuyğun olduğu bildirilsə də, razılaşmanın baş tutması tərəflərdən birinin güzəştə getməsindən asılıdır.wwwwwwwww