Bu bazar İspaniyanın paytaxtında mövsümün ilk “El-Klasiko”su baş tutacaq. “Real Madrid” və “Barselona” üçün bu qarşılaşma həm liderlik uğrunda, həm də mövsümün gedişinə yön verəcək strateji baxımdan xüsusi əhəmiyyət daşıyır. Hər iki komanda mövsümə istədiyi kimi başlayabilmədiyi üçün, matçın gərgin keçəcəyi şübhəsizdir.

Lakin qarşılaşma öncəsi atmosfer artıq meydandan kənarda da qızışıb. Lamine Yamalın açıqlamaları, eləcə də “Barselona” prezidenti Joan Laportanın son bəyanatı “El-Klasiko”ya əlavə intriqa qatıb.

Flick cəzalı, Laporta hakimləri hədəf aldı

Keçən həftə “Jirona” ilə görüşdə Hansi Flikin qırmızı vərəqə alması “Barselona” düşərgəsində böyük narazılıq doğurub. Katalon klubunun apellyasiyası qəbul edilmədiyi üçün alman mütəxəssis “Santyaqo Bernabeu”da texniki zonada iştirak edə bilməyəcək.

Hadisədən dərhal sonra Joan Laporta açıq şəkildə hakimlərə və mümkün “Real Madrid” təsirinə eyham vurdu:

“Əgər ortada “Real Madrid”in təsiri yoxdursa, bu, elə də görünmürdü.”

Bu açıqlama “Los Blankos” düşərgəsində birmənalı qarşılanmayıb və qarşılıqlı söz savaşına səbəb olub.

Kurtuanın cavabı: “Dumanlı pərdə yaratmağa çalışırlar”

Laportanın bu bəyanatından cəmi 48 saat sonra “Real Madrid”in qapıçısı Tibo Kurtua sərt reaksiya verdi. O, “Barselona”nın rəhbərliyini diqqəti öz problemlərindən yayındırmaqda ittiham etdi:

“Onlar sadəcə diqqəti yayındırmaq üçün bəhanə axtarırlar. Unutmayaq ki, hazırda “Barselona” keçmiş Hakimlər Komitəsi üzvünə edilən ödənişlərlə bağlı rüşvət ittihamları ilə üzləşib.”

Yamal da qarşılaşmaya ədviyyə qatdı

Gənc ulduz Lamine Yamal da qarşılaşma öncəsi fikirlərini bölüşərək matçın atmosferini bir qədər də qızışdırıb. O, “Real Madrid”ə qarşı oynamağın hər futbolçu üçün “xüsusi motivasiya” olduğunu bildirib və “Barselona”nın bu dəfə qalib gələcəyinə inamını vurğulayıb.

“El-Klasiko” öncəsi vəziyyət

“Barselona”da Frenki de Yonq və Andreas Kristensenin durumu hələ də qeyri-müəyyəndir, lakin Rafinya və Ferran Torres tam məşq proqramına qoşulublar və oyuna hazırdırlar. “Real Madrid”də isə Trent Aleksander-Arnold və Dani Karvaxal bərpa mərhələsindədir, onların da iştirakı sual altındadır.

Meydanda qalibin kim olacağından çox, bu dəfə meydandan kənar gərginliyin hansı səviyyəyə çatacağı da azarkeşlərin əsas maraq mövzusuna çevrilib.

Lamine Yamal: “Bəli, onlar oğurlayır, şikayət edirlər…” — El-Klasiko öncəsi qalmaqallı açıqlama

“Barselona”nın gənc ulduzu Lamine Yamal “El-Klasiko”dan cəmi bir neçə gün əvvəl verdiyi açıqlama ilə həm “Real Madrid”, həm də futbol ictimaiyyətinin gündəmini silkələdi. Cümə axşamı axşamı “King’s League” turnirinin tanıtım tədbirində məşhur aparıcı Ibai Llanosla birlikdə çıxış edən 17 yaşlı futbolçu “Los Blankos” haqqında səsləndirdiyi fikirlərlə sosial mediada dalğa yaratdı.

Yamalın açıqlaması: “Onlar oğurlayır, şikayət edirlər…”

Söhbət zamanı Ibai Llanos “Real Madrid” barədə sual verəndə, Yamal cavabında tərəddüd etmədən dedi:

“Bəli, onlar oğurlayır, şikayət edirlər, hər şey edirlər… Dayan görək bir az.”

Bu dialoq “Kings League Spain” tərəfindən paylaşılan videoda geniş rezonans doğurdu:

Ibai: “Ah, Madrid oğurlayır?”
Lamine: “A ver…”

Yamalın bu sözləri “Barselona” düşərgəsində tez-tez səsləndirilən ritorikanı əks etdirir. Klub prezidenti Joan Laporta da son aylarda bir neçə dəfə hakimlərin “Real Madrid”ə üstünlük verdiyini açıq şəkildə qeyd edib. Eyni zamanda “Real Madrid” tərəfi də “Barselona”nın keçmiş Hakimlər Komitəsi üzvünə ödənişlərlə bağlı qalmaqalını tez-tez xatırladır.

Qəribə mərc: “El-Klasiko”da yeni qol sevinci ola bilər

Maraqlısı odur ki, Yamal “King’s League”də öz komandasının – La Capital FC – prezidentidir. Cümə günü bu komanda Ibai Llanosun “Porcinos FC”si ilə qarşılaşacaq və tərəflər aralarında şən bir mərc də bağlayıblar.

Əgər La Capital FC qalib gəlsə, Ibai Llanos “Barselona” formasını geyinmək məcburiyyətində qalacaq. Əks halda, Porcinos FC qalib gələcəksə, Yamal “Santyaqo Bernabeu”da qol vurarsa, sevinc zamanı “I” (Ibai) şəklində jest edəcəyini söz verib.

“El-Klasiko” öncəsi əlavə gərginlik

Bu açıqlama “El-Klasiko”dan öncə onsuz da gərgin olan atmosferi bir qədər də alovlandırdı. “Real Madrid” tərəfdarları gənc futbolçunun sözlərini hörmətsizlik kimi qiymətləndirib, sosial mediada sərt tənqidlər yağdırıblar.

“Barselona” isə gənc ulduzunu müdafiə edərək, Yamalın “zarafatla deyilmiş ifadələrinin şişirdildiyini” bildirib.

Bazar günü “Santyaqo Bernabeu”da keçiriləcək qarşılaşma artıq təkcə liderlik uğrunda deyil, həm də emosional və mediada formalaşan müharibə kontekstində izləniləcək.