Koreyalı bombardir İstanbul yolunda

Türkiyənin “Beşiktaş” klubu hücum xəttini yeni futbolçu ilə gücləndirib. “Qara qartallar” Belçikanın “Genk” klubundan O Hyon Qyunu transfer edib.

Klubun rəsmi saytının yaydığı məlumata görə, İstanbul təmsilçisi cənubi koreyalı forvard üçün 14 milyon avro təzminat ödəyəcək. 24 yaşlı hücumçu ilə 2029-cu ilin yayına qədər nəzərdə tutulan müqavilə imzalanıb.

Qeyd edək ki, “Genk” O Hyon Qyunu 2024-cü ilin yayında “Seltik”dən 2,7 milyon avro qarşılığında transfer etmişdi. Cənubi Koreya millisinin üzvü bu mövsüm 32 rəsmi oyunda 10 qol və 3 məhsuldar ötürmə ilə diqqət çəkib.