Fenerbahçe qış transfer pəncərəsində Everton-un hücumçusu Beto-nu heyətinə qatmaq imkanı əldə edib. Türkiyə mətbuatının məlumatına görə, vasitəçilər 27 yaşlı Qvineya-Bisau millisinin üzvünü İstanbul klubuna təklif ediblər.

Fenerbahçe hücum xəttini gücləndirməyi planlaşdırır və Beto uzun müddətdir klubun transfer siyahısında yer alır. Lakin futbolçunun transferi ilə bağlı son qərar baş məşqçi Domenico Tedesco-ya məxsusdur.

Beto 2023-cü ilin avqustunda Udinese-dən 30 milyon avroya Everton-a transfer olunub. İlk dövrlərdə əsas heyətdə stabil yer tapa bilməsə də, sonradan mütəmadi oynamağa başlayıb. Buna baxmayaraq, 2025 2026 mövsümündə hücumçu gözləntiləri doğrultmayıb və bütün turnirlərdə 22 oyunda cəmi 3 qol vurub.

Fenerbahçe hazırda çempionluq yarışında Galatasaray-dan cəmi 3 xal geri qalır və qış transfer dövründə bir neçə mövqeyə güclənmə planlaşdırır. Youssef En Nesyri-nin gələcəyi qeyri-müəyyən olduğundan, Beto alternativ variant kimi dəyərləndirilir.

Hazırda Fenerbahçe-nin rəsmi təklif verib verməyəcəyi bəlli deyil. Beto ilə AS Roma da daxil olmaqla digər klubların da maraqlandığı bildirilir.