Borussia Dortmund yarımmüdafiəçi Julian Brandt ilə müqaviləsini uzatmaq niyyətindədir. Alman futbolçunun hazırkı müqaviləsi bu mövsümün sonunda başa çatır.

Son aylarda Brandt-in yayda azad agent kimi komandadan ayrılıb-ayrılmayacağı ilə bağlı çoxsaylı şayiələr dolaşırdı. Lakin artıq “sarı-qaralar” futbolçunu komandada saxlamaq qərarına gəliblər.

Bununla belə, yeni müqavilənin müəyyən şərtləri olacaq.

29 yaşlı Brandt hazırda illik 7-8 milyon avro qazanır. Yeni razılaşma imzalanarsa, futbolçunun maaşı azaldılacaq və gəlirləri performansa əsasən dəyişəcək.

Brandt-in hazırkı vəziyyəti

Sport direktoru Sebastian Kehl və baş məşqçi Niko Kovaç Brandt-in komandada qalmasının tərəfdarıdır. Kovaçın rəhbərliyi altında Brandt-in performansı son aylarda xeyli yaxşılaşıb.

Komandanın vitse-kapitanlarından biri olan Brandt, start heyətində yer almasa belə, son oyunlarda ehtiyatdan meydana çıxaraq fərqlənib. Məsələn, Bayern Münhenlə qarşılaşmada onun qolu Dortmund-a geri dönüş imkanı yaratmışdı.

Digər tərəfdən, Niklas Süle ilə yollar ayrılacaq. Klub artıq müdafiəçinin müqaviləsini uzatmamaq qərarını verib və o, yayda Dortmund-u tərk edəcək.