Bundesliqa nəhəngləri Borussia Dortmund və RB Leipzig, hazırda “Hamburger SV”də icarə əsasında çıxış edən “Tottenham” futbolçusu Luka Vuskovicin inkişafını diqqətlə izləyir. TEAMtalk xəbər verir ki, gənc müdafiəçi Almaniyada göstərdiyi performansla artıq böyük klubların maraq dairəsinə düşüb.

Vuskovic “Tottenham”a 2023-cü ildə “Hajduk Split”dən 12 milyon funt sterlinq qarşılığında transfer olunmuşdu. Klub onu uzunmüddətli layihə kimi görür və bu mövsüm təcrübə qazanması üçün “Hamburger SV”yə icarəyə göndərib.

Almaniyada parlayan istedad

17 yaşlı xorvatiyalı mərkəz müdafiəçi indiyədək “Hamburger SV” forması ilə 4 oyunda 2 “clean sheet” (qol buraxılmayan oyun) və 1 qolla yadda qalıb. Yerli media onu komandanın ən sabit oyunçusu kimi qiymətləndirir.

Vuskovic həm müdafiədə etibarlılığı, həm də hava toplarındakı gücü ilə diqqət çəkir. O, Heidenheimə qarşı oyunda hesabı açaraq hücumda da potensialını göstərib.

Dortmund və Leipzig maraqda

Borussia Dortmund və RB Leipzig rəhbərliyi oyunçunun çıxışını yaxından izləyir və gələcəkdə transfer üçün addım ata biləcəkləri istisna edilmir. Hər iki klub son illərdə gənc futbolçuların inkişafında uğurlu nümunələr göstərib.

Bununla belə, “Tottenham” oyunçunu satmaq niyyətində deyil. Klub rəhbərliyi onu 2030-cu ilə qədər müqavilə ilə özündə saxlayır və önümüzdəki mövsümdən əsas heyətə daxil etməyi planlaşdırır.

Hazırkı icarə razılaşmasının məqsədi Vuskovicə yüksək səviyyəli oyun təcrübəsi qazandırmaq və Premyer Liqaya tam hazır vəziyyətdə qayıtmasını təmin etməkdir.