Bundesliqada 8-ci tur geridə qalıb və növbəti həftə sonu yenə də bol qollu, gərgin və maraqlı qarşılaşmalarla yadda qalıb. Bəzi komandalar yüksəlişini davam etdirərkən, bəziləri hələ də ilk qələbəsini axtarır.

RB Leypsiq ritmini tapıb

Mövsümün ilk turunda “Bavariya”ya 0:6 hesablı məğlubiyyətlə başlayan “RB Leypsiq” indi tamamilə fərqli komanda təsiri bağışlayır. Ölə Vernerin rəhbərliyi altında komanda son turda “Auqsburq”u 6:0 hesabı ilə darmadağın edib.

Komanda indi sürətli və hücum yönümlü oyunla liqanın zirvəsi uğrunda mübarizə aparmağa qadirdir. Həmin matçda altı fərqli futbolçu qol vurdu, amma diqqət çəkən əsas ad 19 yaşlı Assan Ouedraogo idi.

Yayda “Şalke”dən keçid edən gənc alman yarımmüdafiəçi zədələrə baxmayaraq bu mövsüm bütün səkkiz oyunda iştirak edib, iki qol və iki asistlə yadda qalıb. Ouedraogo matçdan sonra dedi:

“Hamı bir-birinə kömək edir, birlikdə qaçırıq və nəticələr də bunu göstərir. Komanda hazırda çox sabitdir.”

“Leypsiq” növbəti olaraq DFB Pokalın 2-ci raundunda “Energie Cottbus”la qarşılaşacaq, daha sonra isə “Ştutqart”la üz-üzə gələcək.

Frankfurt qalib gəldi – və qapısını toxunulmaz saxladı

Həftəiçi “Liverpul”dan 1:5 hesabı ilə darmadağın olan “Ayntraxt” bu dəfə Bundesliqada düzgün reaksiya göstərdi. “Sankt Pauli” üzərində 2:0 hesablı qələbə komanda üçün həm üç xal, həm də psixoloji dönüş nöqtəsi oldu.

Yeni transfer Conatan Burkardt görüşdə dubla imza atdı. 25 yaşlı hücumçu yayda “Maynts”dən transfer olunduqdan sonra 7 oyunda 6 qol vurub. Onun ardıcıl ikinci həftə dublla yadda qalması Almaniya yığması üçün də maraqlı siqnaldır — Burkardt yaxın aylarda milli komandaya çağırılmağa namizəddir.

Almaniya uzun illərdir real “9 nömrə” problemi yaşayır, lakin Burkardtin oyun tərzi Kai Havertz və Nick Voltemade-dən fərqli olduğuna görə o, millidə yeni alternativ ola bilər.

“Ştutqart” qalib seriyasını davam etdirir

Avropa Liqasında məğlubiyyətə baxmayaraq, Bundesliqada “Ştutqart” qələbələrini sıralamağa davam edir. “Maynts 05” üzərində 2:1 hesablı qələbə komandanın ardıcıl beşinci uğuru oldu.

Qələbə qolunu Denis Undav vurdu. Oyundan sonra hücumçu dedi:

“Bu, gözəl oyun deyildi. Sadəcə qaçmalı, dözməli və doğru anı gözləməli idik.”

Həmin an isə qapıçı Aleksandr Nübelin uzaq ötürməsi ilə gəldi. Nübelin asistindən sonra Undav topu rəqib qapısına göndərdi. Beləliklə, Nübel Bundesliqada ikinci karyera asistini rəsmiləşdirdi.

“Ştutqart” hazırda 3-cü pillədə qərarlaşıb, “Maynts” isə 16-cı yerdə qalmaqda davam edir.