Othmane Maamma cəmi yayda Uotforda transfer olunsa da, klub onu artıq qış transfer pəncərəsində sata bilər. L’Équipe nəşrinin məlumatına görə, İngiltərə klubu 20 yaşlı mərakeşli futbolçudan ciddi gəlir əldə etməyi düşünür.

Maamma Montpelyenin Liqa 2-yə düşməsindən sonra Uotforda 1,3 milyon avroya keçib. O, indiyədək Çempionşipdə 12 oyunda meydana çıxıb, 3 qol vurub və 1 məhsuldar ötürmə verib. Klub futbolçunun bazar dəyərinin 10 milyon avrodan yuxarı qalxa biləcəyini nəzərə alaraq satışa açıqdır.

Futbolçu ilə Premyer Liqa təmsilçisi Bornmut maraqlanır. Klub Antoine Semenyonun Mançester Sitiyə mümkün transferindən sonra hücum xəttini gücləndirməyi planlaşdırır. Bundan başqa, BlueCo qrupuna daxil olan Strasburq da Maammanı izləyir. Qrupun strategiyasına əsasən perspektivli futbolçular əvvəlcə Strasburqda, daha sonra isə Çelsidə inkişaf etdirilir.

Maammanın Uotfordla müqaviləsi 2029-cu ilə qədər qüvvədədir.