Manchester City Liverpool-un uzun müddətdir hədəfində olan Marc Guehi üçün ciddi üstünlük qazanıb. Football Insider-in məlumatına görə, Crystal Palace qış transfer pəncərəsində 25 yaşlı müdafiəçi üçün böyük təklif alacağı halda onun satışını nəzərdən keçirə bilər.

Marc Guehi ötən yay Liverpool-a çox yaxın olsa da, transfer son anda baş tutmamışdı. Crystal Palace futbolçunu komandada saxlamağa nail olmuşdu. Lakin müdafiəçinin müqaviləsinin bitməsinə cəmi altı ay qalıb və bu, klubu çətin qərar qarşısında qoyur.

Chelsea-də istədiyini tapa bilməyən Guehi 2021-ci ildə Palace-a keçdikdən sonra Premyer Liqanın ən güclü müdafiəçilərindən birinə çevrilib. O, klubun FA Cup və Community Shield uğurlarında əsas rol oynayıb və hazırda komandanın kapitanıdır.

Liverpool futbolçunu yayda azad agent kimi transfer etməyi planlaşdırır və onu Virgil van Dijk üçün uzunmüddətli əvəzləyici kimi görür. Lakin Ruben Dias və Joşko Qvardiolun zədələri Pep Guardiola-nı qışda yeni mərkəz müdafiəçisi axtarmağa məcbur edib. Bu da Manchester City-ni real və təcili namizədə çevirir.

Mənbənin bildirdiyinə görə, Crystal Palace Guehi-ni pulsuz itirmək variantına da hazırdır. Ancaq Manchester City çox yüksək məbləğ təklif edərsə, klub bu mövqeyini dəyişə bilər. Bu səbəbdən yanvar transferinin baş tutması City-nin edəcəyi maliyyə təklifindən asılı olacaq.