Everton qış transfer pəncərəsində Flamengo-nun mərkəz müdafiəçisi Leo Pereira-nı heyətinə qatmaq istəyir. Braziliyanın Somos Fanaticos nəşrinin məlumatına görə, Mersisayd klubu 29 yaşlı futbolçu ilə bağlı ilkin addımlar atıb və onun tərəfinə təklif göndərib.

“Everton” müdafiə xəttini gücləndirmək niyyətindədir və bu səbəbdən Leo Pereira əsas namizədlərdən biri kimi nəzərdən keçirilir. Lakin mənbə yanvar ayında bu transferin baş tutmasını az ehtimal edir.

Leo Pereira karyerasının böyük hissəsini Braziliyada keçirib və 2020-ci ildən Flamengo-nun formasını geyinir. O, indiyədək Rio-de-Janeyro klubunda təxminən 300 oyuna çıxıb, 17 qol və 6 məhsuldar ötürmə ilə yadda qalıb.

Everton-da müdafiə xəttində ciddi problemlər var. Jarrad Branthwaite mövsümün əvvəlindən zədəlidir, Michael Keane isə son turda qırmızı vərəqə alıb. Bu vəziyyət David Moyes-i qışda yeni mərkəz müdafiəçisi axtarmağa məcbur edib.

Buna baxmayaraq, Flamengo Leo Pereira-nı mövsümün ortasında buraxmaq niyyətində deyil. Bu səbəbdən Everton-un alternativ variantlara yönələcəyi gözlənilir.