Türkiyə Super Liqasının son çempionu Qalatasaray yanvar transfer pəncərəsində Mançester Yunaytedin yarımmüdafiəçisi Manuel Uqarteni heyətinə qatmağa yaxındır. Türkiyə mətbuatının məlumatına görə, tərəflər arasında danışıqlar irəliləyiş mərhələsindədir və razılaşma yaxın görünür.

24 yaşlı uruqvaylı futbolçu 2024-cü ilin yayında PSJ-dən Mançester Yunaytedə transfer olunsa da, İngiltərə klubunda əsas heyət üzvünə çevrilə bilməyib. Bu mövsüm bütün turnirlərdə 14 oyunda cəmi 597 dəqiqə meydanda olub.

Qalatasaray baş məşqçi Okan Burukun istəyi ilə yarımmüdafiəni gücləndirmək niyyətindədir. Klubun siyahısında bir neçə alternativ olsa da, Uqarte ehtiyat variantlardan biri hesab edilir. Buna baxmayaraq, Mançester Yunaytedin futbolçunu icarəyə buraxmağa hazır olması transferin reallaşma ehtimalını artırır.

Qalatasarayın yaxın günlərdə Uqartenin transferini rəsmiləşdirə biləcəyi bildirilir.