Barselona baş məşqçisi Hansi Flik Kataloniya derbisi öncəsi mətbuat konfransında Lamini Yamalın Espanyol ilə oyuna hazır olduğunu açıqlayıb. 18 yaşlı futbolçu cümə axşamı soyuqdəymə səbəbilə məşqi buraxsa da, matça çıxacaq.

Barselona müdafiəçi axtarışındadır

Hansi Flik transfer pəncərəsi ilə bağlı da danışıb. Alman mütəxəssis bildirib ki, klub müdafiəçi transferi üzərində işləyir. Bununla yanaşı, diqqətin əsasən formda olan Espanyol üzərində cəmləndiyini vurğulayıb. Rəqib La Liqada ardıcıl beş qələbə qazanıb.

RCDE stadionunda gərgin atmosfer gözlənilir

Derbi Espanyolun meydanında keçiriləcək və gərgin atmosfer gözlənilir. Xüsusilə yayda Espanyoldan Barselonaya keçən Joan Qarsiyanın tribunalar tərəfindən sərt qarşılanacağı bildirilir. Flik isə qapıçının psixoloji cəhətdən hazır olduğunu deyib.

Dani Olmo da heyətə qayıdır

Flik Dani Olmonun da oyuna hazır olduğunu təsdiqləyib. İspan yarımmüdafiəçi çiynindən aldığı zədəyə görə bir aya yaxın oynamamışdı. Məşq oyununda iştirak edən Olmonun vəziyyətindən razı qalan baş məşqçi onun derbidə forma geyinə biləcəyini bildirib.

Barselona yeni ilə çətin sınaqla başlayır

Barselona 2026-cı ilə La Liqanın ən formada komandalarından birinə qarşı səfər oyunu ilə start verəcək. Hansi Flik komandasının sakit və keyfiyyətli oyunla nəticə qazanacağına inanır.