Manchester City Crystal Palace klubunun müdafiəçisi Marc Guehi ilə yaxından maraqlanır. Football Insider-in məlumatına görə, “şəhərlilər” qış transfer pəncərəsində müdafiə xəttini gücləndirmək üçün 25 yaşlı mərkəz müdafiəçini əsas hədəflərdən biri kimi müəyyənləşdirib.

Bildirilir ki, Manchester City Guehi üçün 15–20 milyon funt sterlinq dəyərində təklif göndərməyə hazırlaşır. Futbolçu Liverpool-un da maraq dairəsindədir, lakin “qırmızılar” transferi yayda reallaşdırmaq istəyir. City-nin yanvar ayındakı israrı Crystal Palace-ı oyunçunun satışına razı sala bilər.

2021-ci ildə Chelsea-dən Crystal Palace-a keçən Marc Guehi Premyer Liqanın ən stabil müdafiəçilərindən birinə çevrilib və hazırda klubun kapitanıdır. İngiltərə millisinin üzvü London klubunda təxminən 200 oyuna çıxıb, 11 qol və 8 assistlə yadda qalıb.

Manchester City-də Ruben Dias və Joşko Qvardiolun zədələri, həmçinin John Stones və Nathan Akenin qeyri-müəyyən durumu Pep Guardiola-nı yeni müdafiəçi axtarışına vadar edir. Bu səbəbdən Guehi yanvar ayı üçün real namizəd sayılır.

Liverpool isə futbolçunu yayda transfer etməyə üstünlük verir. Bu da hazırda Manchester City-ni daha əlverişli mövqeyə çıxarır.