Manchester United RB Leipzig-in cinah hücumçusu Yan Diomande ilə maraqlanır. Caught Offside nəşrinin məlumatına görə, “qırmızı şeytanlar” 19 yaşlı Fil Dişi Sahili millisinin üzvü üçün ilkin addımlar ataraq Liverpool və Tottenham-ı geridə qoyub.

Yan Diomande bu yay CD Leganesdən RB Leipzig-ə keçdikdən sonra Bundesliqada sürətlə diqqət mərkəzinə düşüb. ABŞ-da yetişən, daha sonra İspaniyada çıxış edən gənc futbolçu Almaniya klubunda qısa müddətdə əsas oyunçulardan birinə çevrilib. O, bu mövsüm bütün turnirlərdə 16 oyunda 7 qol və 4 assistlə fərqlənib.

Manchester United hücum xəttində keyfiyyəti artırmaq niyyətindədir. Amad Diallo və Bryan Mbeumonun Afrika Millətlər Kubokunda iştirakı, həmçinin ümumi hücum problemləri Diomandeni real hədəfə çevirir.

Futbolçu ilə Liverpool və Tottenham da maraqlansa da, RB Leipzig yanvar ayında transferə razı deyil. Almaniya klubu Yan Diomandeni yalnız böyük məbləğ qarşılığında satmağa hazırdır. Bu səbəbdən keçidin daha çox yayda reallaşacağı gözlənilir.