Tottenham Hotspur-un hücumçusu Mathys Tel komandada kifayət qədər şans qazanmamasından narazıdır. RMC Sport-un məlumatına görə, 20 yaşlı fransalı futbolçu baş məşqçi Thomas Frankin rəhbərliyi altında az oynadığı üçün qış transfer pəncərəsində klubu tərk etməyi belə düşünür.

Tel ötən mövsüm Bayern Münhendən icarə əsasında Tottenham-a keçmiş, yayda isə 35 milyon avro qarşılığında transferi rəsmiləşmişdi. Onun London klubu ilə müqaviləsi 2031-ci ilə qədərdir. Mövsümün əvvəlində isə Thomas Frank tərəfindən kənarda saxlanılıb və hətta Çempionlar Liqası üçün heyətə daxil edilməyib. Yalnız Dominic Solankenin zədəsindən sonra yenidən komandaya qaytarılıb.

Məlumata görə, karyerasının bu mərhələsi Telin gözləntilərini doğrultmur. O, Fransa millisinin Dünya Çempionatı heyətində yer almağı hədəfləsə də, az oyun vaxtı bu məqsədi çətinləşdirir.

Buna baxmayaraq, Tottenham rəhbərliyi Mathys Telin qışda ayrılmasına, hətta icarə variantına belə isti baxmır.