BBC-dən sarsıdıcı iddia: qərar mövsümün sonunda veriləcək

“Mançester Siti”nin baş məşqçisi Xosep Qvardiola bu yay İngiltərə klubundan ayrılmağa yaxın ola bilər. Bu barədə BBC məlumat yayıb.

Mənbəyə görə, “şəhərlilər” düşərgəsində ispan mütəxəssisin gələcəyi ilə bağlı qeyri-müəyyənlik hökm sürür və yekun qərarın mövsümün sonuna yaxın veriləcəyi gözlənilir. Bildirilir ki, Qvardiola komandada qalsa belə, 2027-ci ildə başa çatan müqaviləsini uzatması çətin görünür.

Hazırda “Mançester Siti” Premyer Liqada 24 turdan sonra 47 xalla ikinci pillədə qərarlaşıb. Komanda eyni zamanda Çempionlar Liqasının 1/8 finalına, İngiltərə Liqa kubokunun finalına və ölkə kubokunun 1/16 finalına yüksəlib.

Qeyd edək ki, 55 yaşlı Qvardiola 2016-cı ildən “Mançester Siti”yə rəhbərlik edir. Onun dönəmində klub 6 dəfə Premyer Liqa, 2 dəfə İngiltərə kuboku, 4 dəfə Liqa kuboku, 3 dəfə Superkubok qazanıb. 2023-cü ildə isə “Siti” Çempionlar Liqası, UEFA Superkuboku və Klublararası dünya çempionatının qalibi olub.