Barselona çərşənbə günü Səudiyyə Ərəbistanında Atletik Bilbao ilə qarşılaşacaq və İspaniya Superkubokunun finalına vəsiqə uğrunda mübarizə aparacaq. Hansi Flikin komandasında ciddi kadr problemləri yoxdur.

Qavi və Andreas Kristensen uzunmüddətli diz zədələrinə görə hələ də heyətdən kənardadır. Digər futbolçular isə Superkubok üçün Ər-Riyada yollanıb. Qapıçı Mark Andre ter Ştegen zədə səbəbilə İspaniyaya qayıdaraq tibbi müayinədən keçəcək.

Baş məşqçi Hansi Flik mətbuat konfransında Ronald Arauxonun durumuna toxunub və hücum xəttində seçim imkanlarının geniş olduğunu bildirib. Onun sözlərinə görə, hər mövqedə rəqabət var və bütün futbolçular komandaya maksimum fayda verməlidir.

Barselona oyuna 4-2-3-1 sxemi ilə çıxacaq. Qapıda Joan Qarsiya yer alacaq. Müdafiə xəttində Jül Kunde, Pau Kubarsi, Gerard Martin və Alexandro Balde oynayacaq. Yarımmüdafiədə Erik Qarsiya və Frenki de Yonq duet təşkil edəcək, hücumun arxasında isə Pedri çıxış edəcək. Hücumun mərkəzində Ferran Torres, cinahlarda isə Rafinya və Lamin Yamal yer alacaq. Markus Reşford və Robert Levandovski oyuna ehtiyatdan qoşula bilər.