Çelsi çərşənbə axşamı səfərdə Fulhemlə qarşılaşacaq və Moyses Kaysedo yenidən start heyətində yer alacaq. London derbisi “mavilər” üçün son turlardakı uğursuzluqlardan sonra vacib hesab olunur.

Kaysedo diskvalifikasiyasını Mançester Siti ilə oyunda başa vurub və matça hazırdır. Robert Sançes, Uesli Fofana və Mark Kukurelya zədədən sonra meydana qayıtmağa yaxındır və oyundan öncə tibbi yoxlamadan keçəcəklər. Levi Kolvill, Dario Essuqu və Romeo Lavia isə hələ də zədə səbəbindən heyətdən kənardadır. Mixaylo Mudrik diskvalifikasiya səbəbilə oynamayacaq.

Müvəqqəti baş məşqçi Kalum MakFarlan bildirib ki, zədəli futbolçular məşqlərdə iştirak edir və yekun qərar son məşqdən sonra veriləcək.

Çelsinin oyuna 4-2-3-1 sxemi ilə çıxacağı gözlənilir. Qapıda Filip Yorgensen yer alacaq. Müdafiədə Risi Ceyms, Trevo Çaloba, Benua Badiashil və Malo Qusto oynaya bilər. Yarımmüdafiədə Kaysedo ilə Enso Fernandes duet təşkil edəcək. Hücumun arxasında Kol Palmer, cinahlarda Estevao Vilyan və Pedro Neto, hücumun mərkəzində isə Joao Pedro yer alacaq.