PSJ ulduzu topuğundan zədə aldı

Paris Sen-Jermen hücumçusu Xviça Kvaratsxeliya təxminən iki həftə forma geyinə bilməyəcək. L’Équipe nəşrinin yaydığı məlumata görə, gürcü futbolçu Çempionlar Liqasında “Nyukasl”la oyunda topuq nahiyəsindən zədələnib.

Müayinələrdə sınıq aşkarlanmadı

İsveçli Entoni Elanqanın müdaxiləsindən sonra oyunun 22-ci dəqiqəsində meydanı tərk edən Kvaratsxeliya cümə axşamı tibbi müayinədən keçib. Yoxlamalar zamanı topuqda sınıq olmadığı, sadəcə burxulma baş verdiyi müəyyənləşib.

Vacib oyunları buraxa bilər

Kvaratsxeliya “Strasburq”la qarşılaşmada forma geyinməyəcək. Onun 8 fevralda “Marsel”lə keçiriləcək “Le Classique”də iştirakı da sual altındadır. Futbolçunun “Renn”lə oyuna və Çempionlar Liqasının pley-off mərhələsinin ilk matçına hazır olub-olmayacağı bərpa prosesindən asılı olacaq.

Luis Enrikenin əsas fiqurlarından biridir

24 yaşlı cinah oyunçusu bu mövsüm PSJ-nin əsas fiqurlarından sayılır. Kvaratsxeliya bütün turnirlərdə 27 oyunda iştirak edib, 7 qol vurub və 6 məhsuldar ötürmə verib.