Real Madrid şənbə günü La Liqa çərçivəsində Levante-ni qəbul edəcək, lakin qarşılaşmada Kylian Mbappe iştirak etməyəcək. Fransız hücumçu dizindən yaşadığı narahatlıq səbəbindən riskə atılmayacaq.

Madrid klubu üçün həftə çox çətin keçib. Komanda İspaniya Superkubokunun finalında Barcelona-ya uduzub, ardınca isə Kral Kubokunda Segunda təmsilçisi Albacete-yə məğlub olaraq turnirdən kənar qalıb. Bu prosesdə Xabi Alonso baş məşqçi postunu tərk edib, onun yerinə Alvaro Arbeloa gətirilib.

Arbeloa Bernabeu-da ilk ev oyununa çıxacaq, lakin Mbappe yenə də heyətdə olmayacaq. Marca-nın məlumatına görə, hücumçu məşqlərdə iştirak etsə də, klub daxilində onun Levante ilə matçda oynamaması qərara alınıb. Mbappe Superkubokda ağrılarla oynamışdı və həkimlər əlavə risk istəmir.

Mbappe-nin yoxluğunda əsas namizəd Gonzalo Garciadır. 21 yaşlı hücumçu son 4 oyunda 5 qol vurub. Bu seriyaya Betis-ə qarşı het-trik, El Klasikoda bir qol və Albacete ilə kubok matçında fərqlənməsi daxildir.

Real Madrid qələbə yoluna qayıtmaq istəyir, lakin son 3 oyunda məğlub olmayan Levante-yə qarşı bunu etmək asan olmayacaq.