Real Madrid bazar günü Rayo Vallecano ilə səfərdə keçirdiyi oyunda 0:0 hesablı heç-heçə edib. Görüş yalnız nəticə baxımından deyil, həm də komandanın zəif oyunu və yeni zədələr səbəbindən rəhbərliyi narahat edib. Bu, ardıcıl ikinci oyundur ki, “Kral klubu” zəif təsir bağışlayır — bundan öncə də Liverpool qarşısında uğursuz çıxış etmişdilər.

Valverde zədəsini tam sağaltmamış oynayıb

Matçın 83-cü dəqiqəsində Federiko Valverde zədə səbəbindən meydanı tərk etməli olub. İspaniyanın Diario AS nəşri yazır ki, uruqvaylı yarımmüdafiəçi artıq Liverpoolla görüşdə də narahatlıq hiss edib və bu, tam keçmədiyi üçün Rayo matçında problem yenidən özünü göstərib.

Valverdenin bud və addüktor əzələsində ağrılar var. Klubun həkim heyəti 24 saat ərzində futbolçunu tibbi müayinədən keçirəcək. İlkin ehtimallara görə, zədə ciddi deyil və millilər üçün olan fasilə onun tam bərpa olması üçün vaxt qazandıracaq.

Courtois-da da problem yaranıb

Zədəli futbolçular siyahısına Tibo Courtois da əlavə olunub. Belçikalı qapıçı matçdan sonra bud nahiyəsində ağrı hiss edib. Onun da tibbi müayinədən keçəcəyi bildirilir, lakin ilkin məlumatlara görə, vəziyyət ciddi deyil. Bununla belə, Belçika millisinin qarşıdakı Qazaxıstan və Lixtenşteynlə oyunlarında Courtois-ın oynayıb-oynamayacağı hələ dəqiq məlum deyil.

Real Madrid-in növbəti hədəfi

Real Madrid beynəlxalq fasilədən sonra Elche səfərinə çıxacaq. Baş məşqçi Xabi Alonso həm Valverdenin, həm də Courtois-ın o vaxta qədər 100 faiz formada olacağına ümid edir. Komanda hazırda La Liqa-nın lideridir, lakin ardıcıl zəif oyunlar və yaranan zədələr Madrid klubunda müəyyən gərginlik yaradıb.

Yeni tibbi müayinələrin nəticələri yaxın günlərdə açıqlanacaq və bu, “Kral klubu”nun gələcək planlarına birbaşa təsir göstərə bilər.