UEFA “Milan” və “Como” arasında keçiriləcək Serie A oyununa Avstraliyanın Pört şəhərində ev sahibliyi etməyə icazə verib. Bu qərarla ilk dəfə rəsmi Serie A oyunu Avropa hüdudlarından kənarda oynanacaq.

Bu matçın köçürülməsinin əsas səbəbi San Siro stadionunun 2026 Qış Olimpiya Oyunlarının açılış mərasiminə hazırlıq üçün bağlı olmasıdır. Alternativ stadion axtarışındansa, İtaliya Futbol Federasiyası bu fürsətdən futbolun beynəlxalq tanıtımı üçün istifadə etməyi seçib.

UEFA əvvəlcə bu təşəbbüsə qarşı çıxsa da, hüquqi baxımdan qərarı bloklamaq üçün əsas tapmayıb. Qurum açıqlamasında bildirib ki, “Milan – Como” və “Vilyarreal – Barselona” matçları istisna hal kimi qəbul edilir və FIFA-nın gələcəkdə bu mövzuda qaydalar müəyyənləşdirməsini tövsiyə edib.

A Seriyasının prezidenti Etzio Simonelli qərarı müsbət qiymətləndirib:

“B planı bir fürsətə çevrildi. Bu oyun həm İtaliya futbolu üçün reklam, həm də kommersiya baxımından önəmli hadisə olacaq.”

Məlumatlara görə, Pört şəhəri oyuna ev sahibliyi üçün 12 milyon avro ödəyəcək. Gəlirin əsas hissəsi “Milan” klubuna çatacaq, çünki komanda ev oyunundan gəlir əldə etməyəcək. Pulun bir hissəsi səfər və logistik xərcləri qarşılayacaq, qalan hissə isə digər Serie A klublarına bölünəcək.

Oyun 7 və ya 8 fevral 2026-cı ildə keçiriləcək. Komandalar həftənin əvvəlində Avstraliyaya uçaraq fərqli saat qurşağına və iqlimə uyğunlaşmağa çalışacaqlar.

“Milan” rəhbərliyi bildirib ki, abonement sahiblərinə (season-ticket holders) həmin oyuna görə voucher veriləcək, həmçinin Avstraliyaya səyahət etmək istəyən azarkeşlər üçün endirim və təşəbbüslər planlaşdırılır.

Qeyd edək ki, “Milan” son iki il ərzində artıq Pörtdə iki yoldaşlıq oyunu keçirmişdi, bu da klubun Avstraliya bazarında daha çox tanınmasına səbəb olub.