“Mançester Yunayted” Emiliano Martinezi heyətinə qatmaq istəyir

“Mançester Yunayted” qapı xəttində təcrübəli oyunçu çatışmazlığını aradan qaldırmaq üçün yanvar transfer pəncərəsində Emiliano Martinezi heyətinə cəlb etməyi planlaşdırır. Football Insider xəbər verir ki, klub rəhbərliyi yeni təcrübəli qapıçı transfer etmək niyyətindədir və “Aston Villa”nın argentinalı ulduzu bu istiqamətdə əsas namizədlərdən biridir.

Martinez yay transfer dönəmində də “qırmızı şeytanlar”la əlaqələndirilmişdi, lakin keçid baş tutmamışdı. İndi isə “Mançester Yunayted”in dünya çempionu qapıçı üçün yenidən hərəkətə keçib-keçməyəcəyi maraq doğurur. Şübhəsiz ki, Martinez hazırda Premyer Liqanın ən yaxşı qapıçılarından biridir və onun gəlişi komandanın müdafiə sabitliyini artırmaq potensialına malikdir.

Yayda “Mançester Yunayted” “Royal Antwerp”dən 23 yaşlı Senne Lammensi transfer etmişdi. Gənc qapıçı hələ əsas heyət üzvünə çevrilməsə də, son turda “Sanderlend”ə qarşı çıxışı ilə müsbət təsir bağışlayıb. Buna baxmayaraq, klub rəhbərliyi mövqedə rəqabəti gücləndirmək niyyətindədir.

Əsas qapıçı André Onana “Trabzonspor”a icarəyə göndərilib, türk qapıçı Altay Bayındır isə gözlənilən performansı göstərə bilməyib. Bu səbəbdən Lammens və Martinezin eyni anda heyətdə olması “Yunayted” üçün ideal ssenari sayılır.

Martinez üçün yeni çağırış

30 yaşlı Emiliano Martinez üçün “Mançester Yunayted”ə keçid karyerasında böyük fürsət ola bilər. Argentinalı ulduz artıq yığma ilə dünya çempionluğu qazanıb və indi klub səviyyəsində də böyük titullar uğrunda mübarizə aparmaq istəyir.

“Aston Villa” hazırda çətin dövr keçirir və yaxın zamanda böyük uğurlar əldə edəcəyi real görünmür. Kariyerasının zirvəsində olan Martinez bu illəri “böyük klub”da keçirmək istəyir. Keçmiş “Arsenal” qapıçısı üçün “Mançester Yunayted”e transfer həm iddialı, həm də məntiqli addım hesab olunur.